First Hydro Company
Safle Mynydd Gwefru (24/02/2021)
Dyddiad: 24/02/2021
Fel y bydd llawer yn gwybod, ers 2018 rydym wedi bod yn gweithio ar gynlluniau i ailddatblygu Canolfan Ymwelwyr y Mynydd Gwefru (EMVC) yn Llanberis. Mae’n bosibl bod y rhai sydd yng nghyffiniau’r safle neu’n ymweld â’r ardal wedi gweld yr adeiladau dros dro sydd wedi bod ar waith a helpodd i barhau i gynnal teithiau o amgylch Gorsaf Bŵer Dinorwig ar gyfer tymor 2019.
Y tu hwnt i effeithiau pandemig Covid-19 mae’r prosiect ailddatblygu wedi wynebu rhai heriau anorchfygol, sydd yn anffodus wedi ein gorfodi i ganslo’r gwaith o adnewyddu’r cyfleusterau.
Yn benodol bu cyflymiad o waith peirianyddol mawr yn Ninorwig er mwyn ymestyn oes gweithredu'r orsaf bŵer am y degawdau nesaf. Yn anffodus, bydd y gwaith yn golygu na fydd yn bosibl hwyluso teithiau tanddaearol am y blynyddoedd nesaf - sydd yn draddodiadol wedi bod yn gonglfaen i arlwy EMVC. Ar hyn o bryd nid oes unrhyw gynlluniau ar waith i ailagor adeilad canolfan ymwelwyr newydd. Nid yw teithiau o amgylch yr Orsaf Bŵer ar gael bellach.
Mae'r gwaith o ddymchwel ac ailbwrpasu safle Canolfan Ymwelwyr y Mynydd Gwefru wedi'i gwblhau'n llwyddiannus gan Jones Bros Civil Engineering, gan ddarparu ardal o laswelltir agored.
Mae'r maes parcio sydd ag arwyneb newydd bellach yn cynnwys pwyntiau gwefru cerbydau trydan. Mae’r maes parcio wedi’i wella ar gyfer modurwyr a’r gymuned mewn amrywiol ffyrdd:
Cydymffurfio â'r system Talu ac Arddangos ac ychwanegu lefel o ddiogelwch
- Bydd mwy o beiriannau talu i wella'r broblem ciwio
- Bydd gan y peiriannau gysylltedd gwell fel y bydd taliadau cerdyn yn cael eu prosesu'n llawer cyflymach
- Bydd y maes parcio yn cael ei reoli gan gamerâu ANPR, gan atal gweithgarwch gwrthgymdeithasol y tu allan i oriau
- Gellir talu am barcio ar y dechrau, ar y diwedd neu ychwanegu ato er hwylustod
- Gan fod y safle wedi ei leoli o fewn ardal Tirwedd Arbennig, rhoddwyd ystyriaeth i raddfa a natur y datblygiad gan sicrhau nad oes effaith andwyol sylweddol ar y dirwedd.
Mae mesurau lliniaru ar gyfer clwydo ystlumod lleiaf ac ystlumod lleiaf soprano yn cynnwys darparu pum blwch ystlumod ychwanegol a chlwydfan ystlumod o fewn gofod to adeilad yr is-orsaf a gedwir.
Mae pedwar blwch nythu adar a phentyrrau malurion hefyd wedi'u creu o fewn yr ardaloedd coetir cyfagos fel mesur lliniaru ar gyfer colli cynefinoedd ac aflonyddu dros dro ar ddraenogod.
Mae’r orsaf bŵer o dan Chwarel Dinorwig yn parhau i fod yn orchest beirianyddol o arwyddocâd cenedlaethol a byddem yn gobeithio dod o hyd i ffordd arall, hyfyw, i arddangos ei gweithrediadau yn y dyfodol.
Fel bob amser, byddwn yn parhau i ymgysylltu â’r cymunedau drwy gefnogi prosiectau, cynlluniau, a digwyddiadau lleol – ac yn parhau i weithio gyda fforymau er budd yr ardal leol.
Ar gyfer ymholiadau’n ymwneud â’r Mynydd Gwefru, cysylltwch â communityhelp@electricmountain.co.uk
